İnsan hüquqlarına və azadlıqlarına hörmət edilməsi müasir beynəlxalq hüququn əsas prinsiplərindən biridir. Müvafiq beynəlxalq sazişlərdə iştirak edib-etmədiklərindən və insan hüquqlarının milli hüquq sistemlərində tənzimlənməsi xarakterindən və səviyyəsindən asılı olmayaraq, bütün dövlətlər beynəlxalq səviyyədə tanınmış hüquq və azadlıqlara hörmət bəsləməli və öz yurisduksiyaları daxilində bunlara riayət olunmasını təmin etməlidirlər. Dissertasiyada insanın əsas hüquq və azadlıqlarının məhdudlaşdırılması əsaslarını və prinsiplərini nəzərdə tutan beynəlxalq sazişlərin müddəalarının məzmununu açıqlamaq məqsədi ilə, habelə Azərbaycan Respublikası qanunvericiliyinin müvafiq müddəalarının təhlili zamanı formal-məntiqi metoddan daha geniş istifadə edilmişdir.