Emili Brontenin yaradıcılıq yolu və ədəbi irisinin təhlili göstərir ki, o hər zaman ictimai həyatda baş verən hadisələrə münasibət bildirmiş, onun nəsri insan və yaşadığı dünyaya qayğı ilə işlənmiş, ictimai motivləri ilə fərqlənən qeyri-adiliyi ilə seçilir. Bu baxımdan onun yaradıcılığının zirvəsi hesab olunan “Uğultulu təpələr” əsərinin filoloji təhlilə cəlb olunması elmi aktuallıq kəsb edir. Yazıçının bu əsəri onun bədii təfəkkürü, dünyagörüşü, həyat tərzi haqqında müəyyən təsəvvür əldə etməyə imkan verir. Emili Bronte nəsri tarixi hadisə və prosesləri özünəməxsus bədii üslubi maneralarla əks etdirməsi ilə səciyyəvidir.