Mif insan təxəyyülünün müxtəlif vəziyyətlərdə müəyyən məqsədlər üçün yaradılmış məhsuludur. Mif emosional və məntiqi assosiasiyalarla təbiətin, dünyanın dərk edilməsidir. XX əsr mədəniyyətində mif xüsusi əhəmiyyət kəsb etmişdir. XX əsrin yanaşmasında mif artıq alleqorik uydurma deyil, elmi təfəkkür, dil, incəsənət, dinlə bərabərhüquqlu dünyanın dərk olunma formalarından biridir. Əslində gerçəklik simvolik formalardan kənarda mövcud ola bilməz, insan onlarsız dinin, incəsənətin, fəlsəfənin, elmin müxtəlif yönlərindən ona məlum olan “ideal dünya”ya giriş əldə edə bilməz. Məhz XX əsrdə mif insan şüurunun və mədəniyyətin sirlərini açmaq üçün özünəməxsus açar rolunu oynadı.