Azərbaycan xalqının ümummilli lideri Heydər Əliyevin çoxcildlik əsərlərinin bu cildinə 1997-ci ilin oktyabrından dekabr ayına qədər olan dövrdəki çıxışları, nitqləri, bəyanatları, müsahibələri, məktubları, müraciətləri, fərmanları, daxil edilmişdir.Burada respublika Prezidentinin Azərbaycan yazıçılarının X qurultayı ərəfəsində ədəbiyyatımızın yaşlı və gənc nəslinin nümayəndələri ilə görüşləri, qurultayda yalnız ədəbiyyat və mədəniyyətin deyil, bütövlükdə müasir Azərbaycanın problemlərini əks etdirən parlaq nitqi, Xəzər dənizinin Azərbaycan sektorunda xarici şirkətlərlə birgə işlənilən "Çıraq" neft yatağından ilkin neftin çıxarılmasına həsr olunmuş mərasimin materialları, Tehranda İslam Konfransı Təşkilatının VIII zirvə görüşündə İslam ölkələrinin dövlət və hökümət başçıları ilə apardığı dərin məzmunlu danışıqları, müxtəlif səviyyəli görüşlərdəki söhbətləri, bəyanatları öz əksini tapmışdır. Cildə daxil edilmiş materiallarda həmçinin Azərbaycan ilə MDB ölkələri arasındakı ənənəvi dostluq əlaqələrinin möhkəmlənməsi və genişlənməsi, müstəqil dövlətimizin Milli Ordusuna ümumxalq qayğısının və diqqətinin artırılması, respublikamızın ictimai-siyasi və iqtisadi-mədəni həyatının vacib məsələləri, daxili və xarici siyasətinin başlıca istiqamətləri əks edilir.