1998-ci il oktyabrı müstəqil Azərbaycanın şərəfli dövlətçilik tarixinə prezident seçkisi kimi daxil olmuşdur.Oxuculara təqdim olunan bu cilddə Azərbaycan xalqının ümummilli lideri Heydər Əlirza oğlu Əliyevin prezident seçkisi ilə əlaqədar keçirdiyi görüşlərdəki çıxışlar, informasiya vasitələrinə verdiyi müsahibələr, respublikamızın hərtərəfli inkişafı və yüksəlişi yolunda əvəzsiz xidmətlər göstərmiş, xalqın iradəsi ilə ikinci dəfə Azərbaycan Respublikasının prezidenti Heydər Əliyevin təntənəli andiçmə mərasimində söylədiyi dərin məzmunlu nitqi toplanmışdır. Kitabda müdrik dövlət xadiminin ölkəmizin ictimai-siyasi həyatına, iqtisadi-maliyyə sisteminə, dövlət idarəçiliyinin inkişafına, özəl sektorun genişlənməsinə, Azərbaycanın beynəlxalq nüfuzunun, onun haqq işinin dünya miqyasına yüksəldilməsinə, tarixi İpək yolunun bərpası üzrə Beynəlxalq Bakı Konfransına, Azərbaycanda insan hüquqları ilə əlaqədar tədbirlərin müəyyən edilməsinə aid materiallar, həmçinin Türkiyə Cümhuriyyətinin yaradılmasının 75-ci ildönümü münasibəti ilə yubiley mərasimindəki çıxışı, yüksək səviyyəli görüşləri, danışıqları, Bakı-Tbilisi-Ceyhan neft boru kəmərinin çəkilməsi ilə əlaqədar imzalanmış Ankara bəyannaməsi və s. öz əksini tapmışdır. Kitabda, həmçinin, Azərbaycanın şəhid olmuş döyüşçülərinin valideynlərinə, ailə üzvlərinə, qaçqın və məcburi köçkünlərə, elm, ədəbiyyat, mədəniyyət xadimlərinə və idmançılara böyük diqqət və qayğı, onlara Azərbaycanın dövlət mükafatlarının təqdim olunması, milli-mənəvi dəyərlərə, İslam sivilizasiyasına yüksək qiymət də öz əksini tapmışdır.