Müasir Azərbaycan dövlətinin qurucusu, xalqımızın ümummilli lideri Heydər Əlirza oğlu Əliyevin oxuculara təqdim olunan çoxcildlik əsərlərinin bu cildində ölkəmizin tərəqqisi naminə görülən işlər, dövlətimizin ictimai-siyasi, iqtisadi və mədəni həyatına, həmçinin xarici ölkələrlə əlaqələrin daha da genişlənməsinə aid zəngin materiallar dərc olunmuşdur. Kitabda ulu öndərin MDB ölkələrinin dövlət başçıları şurasının Minskdə keçirilən toplantısında, GUÖAM təşkilatının dövlət başçılarının Yaltadakı zirvə görüşündə iştirakına, kütləvi informasiya vasitələri nümayəndələrinə verdiyi müsahibələr öz əksini tapmışdır. Bu cilddə unudulmaz rəhbərin Azərbaycana gələn Türkiyə, Rusiya, Ukrayna, Almaniya, Livan, Norveç, İran və Polşanın dövlət və hökumət nümayəndə heyətləri ilə, türk dünyasının böyük oğlu, alim İhsan Doğramacı, Moskvanın və bütün Rusiyanın patriarxı II Aleksi ilə yüksək səviyyəli görüşlərin materialları, 28 May – Respublika gününə həsr olunmuş təntənəli mərasimdə parlaq nitqi, 8-ci Beynəlxalq «Xəzər, neft, qaz, neftayırma və neft kimyası» sərgisi açılışında çıxışı, çoxsaylı məktubları və sair sənədlər verilmişdir.