Azərbaycan Respublikasının prezidenti Heydər Əliyevin oxuculara təqdim olunan çoxcildlik əsərlərinin 39-cu cildində «Xəzərneftqaz – 2002» IX Beynəlxalq sərgi-konfransdakı nitqi, Sankt-Peterburqda dahi Azərbaycan şairi Nizami Gəncəvinin heykəlinin açılışındakı çıxışı, Rusiya Federasiyasının prezidenti Vladimir Putinlə, ATƏT–in Minsk qrupunun həmsədrləri, Azərbaycan diasporunun nümayəndələri ilə danışıqları, Dağlıq Qarabağ, Xəzər dənizinin statusu məsələlərinə aid ölkəmizin prinsipial mövqeyindən bəhs edən sənədlər verilmişdir. Kitabda Ümummilli lider Heydər Əliyevin Naxçıvana səfəri zamanı «N» hərbi hissənin şəxsi heyəti və şəhər sakinləri ilə görüşlərdəki, Olimpiya İdman Kompleksinin, Bəhruz Kəngərli muzeyinin açılış mərasimlərindəki, Naxçıvan MR-nın Ali Məclisdə nitqi və çıxışları da öz əksini tapmışdır. Bu cilddə, eyni zamanda, İstanbulda Qara Dəniz İqtisadi Əməkdaşlıq Təşkilatının 10 illiyi ilə əlaqədar bu təşkilatın üzvü olan ölkələrin dövlət başçılarının zirvə görüşündə, Türkiyə prezidenti Əhməd Necdət Sezərlə, İstanbul, Ankara və Qarsda nüfuzlu dairələrin nümayəndələri ilə görüşlərdəki nitqləri, rəmzi olaraq «Üç dənizin əfsanəsi» (Xəzər dənizi, Qara dəniz, Aralıq dənizi) adlandırılan konfransda çıxışı və ayrı-ayrı dövlət və hökumət başçılarına ünvanladığı məktublar toplanmışdır.