Türk dünyası və XX əsr ədəbiyyatının ən böyük şairlərindən olan Nazim Hikmət (1902-1963) Türkiyə, Azərbaycan, başqa türk və Şərq xalqlarının poeziyasına misilsiz təsir göstərmiş, şeirdə yeni yollar açmış novator sənətkar, əsrin klassikidir. Siyasi əqidəsindən, aldanışlarından və xəyal qırıqlığından asılı olmayaraq, bəlkə də, elə bütün bunlara görə mücadilələr və iztirablar, ümidlər və itkilər dolu, tufanlı, qasırğalı bir ömür yolu keçmiş Nazim insan dünyasının zənginliyini, duyğular aləminin incəliklərini, həyatın mürəkkəbliyini, dünyanın təzadlarını bütün dolğunluğuyla əks etdirə bilən və türk şeiri tarixində əbədiyaşar qalacaq bir sənətkar kimi ucalmaqdadır.