Dil kimliyi problemi bütün bu cərəyan və istiqamətlərin araşdırma sahələrinin kəsişmə nöqtəsində qərar tutan qəliz və çoxrakuslu problemdir. Belə ki, fərdin, xüsusilə də yaradıcı şəxsin dil kimliyi bilavasitə dilinin daşıyıcısı olduğu toplumun etnomentallığını əks etdirməklə etnopsixologizmin maraq dairəsinə daxildir. Digər tərəfdən yaradıcı şəxsin fərdi psixo-emosional özəllikləri psixoloji cərəyan nümayəndələrinin fikirlərinin, habelə ümumilikdə psixolinqvistik araşdırmalarının elmi müddəalarının nəzərə alınmasını labüd edir.