Cənubi Qafqaz ölkələri nəqliyyat-coğrafi mövqelərinə görə əhəmiyyətli tranzit potensialına malikdirlər. Bu da onların iqtisadiyyatının transformasiyasında əsas rol oynayır. Yeni beynəlxalq kommunikasiyaların yaradılması Cənubi Qafqaz ölkələrinin ticarət-iqtisadi əlaqələrinin dinamikasında və coğrafiyasında mühüm dəyişikliklərə səbəb olur. Yeni infrastruktur obyektləri Türkiyə-Gürcüstan-Azərbaycan oxu boyunca regionda aydın şəkildə görünən qeyri-formal inteqrasiya vektorlarını göstərir. Bu ox boyunca iqtisadi qarşılıqlı əlaqə formal fəaliyyət göstərən inteqrasiya birlikləri çərçivəsində olduğundan nəzərəçarpacaq dərəcədə böyükdür.