Tədqiqat işində Q.Q.Markezin Latın Amerikanın tarixi-siyasi hadisələrinə həsr olunmuş əsərlərindən biri olan “Labirintindəki general” əsərinin yazılmasının bədii məqsədi, əsərin qəhrəmanı olan Simon Bolivar xarakterinin Markez qələmində təzahür forması, tarixi gerçəkliklərlə Simon Bolivar xarakteri arasındakı təbəddülatlar araşdırılmışdır. Simon Bolivarın ispan fatehlərindən canı bahasına qazandığı azadlığın qitəyə gətirdiyi bəlaların Markez qələmində özünəməxsus bədii metodlarla açılması ilə bağlı məsələlərə toxunulmuşdur. Bu bəlaların Simon Bolivar xarakterinin inkişaf trayektoriyasına hansı səpkidə təsir göstərməsi təhlil olunmuşdur.